BUTUAN CITY – Hustisya ang singgit karon sa pamilyang Bag-ao sa may Barangay Kalibunan, Cabadbaran City tungod sa pagkamatay sa Grade 10 student human nag-collapse atol sa pagdula og badminton sa intramurals sa Mindanao Institute kon MI.
Gisaysay mismo sa inahan niini nga si Vilma Bag-ao sa eksklusibong pakighinabi sa Bombo Radyo Butuan, ang nahitabo, nga niadtong lunes dihang sayong miadto sa eskwelahan ang iyang 16-anyos nga anak nga si Yusho tungod kay duna’y gi-apilang dulang badminton butang nga iyang gikapalagan tungod kay nagsuspende man gani ang lokal nga kagamhanan sa klase tungod sa taas nga heat index.
Daan nang mipalag ang inahan tungod kay nag-parade na ang mga estudyante unya gipadali-dali sila sa ilang anak pagpirma sa parent’s consent human na sa parada.
Niadtong Agusto 26, dunay championship game ang iyang anak anang hapon rason nga miadtu sila sa iyang bana aron mutan-aw apan nalipat sila nga sa luyo nga parte diay sa tunghaan ang dula.
Sigon pa niini nga sa dihang nasayud sila kung asa ang dula sa iyang anak, gipahibalo na sila nga nakuyapan ang iyang anak ug gidala sa school clinic. Pag-abot nila lagom na ang iyang anak ug dihang gidala sa ospital, gideklara na kining dead on arrival. Tungod sa kasakit napuno sa pagpangutana ang inahan ngadto sa maong tunghaan.
Bisan ang napirmahan niini nga consent, gibatikos pa tungod sa pagpadali-dali. Aminado ang inahan nga dunay sakit sa kasing-kasing ang iyang anak apan wala matud pa kini sukad nakuyapan o gitabang gawas niadtong tungora.
Gidawat matud pa niya ang pasaylo nga gipangayu sa mga magtutudlo apan gisalig na niya ngadto kang Mayor Chin Amante ang pagpangeta sa tulubagon. Kini tungod kay gihimo ang maong dula bisan paman sa kamanduan sa mayor nga ibawal ang outdoor activities tungod sa ka-init sa panahon.
Bukas ang Bombo Radyo Butuan pagpaminaw sa panig sa Mindanao Institute aron maklaruhan ang tanan kalabot sa maong hitabo.
