BUTUAN CITY – Giklaro ni Vice President Sara Duterte ang kamahinungdanon sa breastfeeding alang sa kahimsog ug maayong nutrisyon sa mga batang masuso subay na sa selebrasyon sa National Breastfeeding Awareness Month ug World Breastfeeding Week.
Sa iyang gipagawas nga mensahe, gi-awhag niini ang mga inahan nga ipadayon ang pagpasuso sa ilang mga anak, samtang gipahinumdoman ang mga pamilya, komunidad ug mga institusyon nga hatagan og tukmang suporta ang mga inahan nga nagpasuso.
Sumala sa besi presidente, dili lamang responsibilidad sa inahan ang breastfeeding tungod kay dako usab og papel niini ang pamilya, mga healthcare workers, komunidad ug gobyerno sa paghimo og palibot nga komportable ug luwas alang sa mga inahan ug ilang mga masuso.
Pinaagi sa hustong suporta ug impormasyon, mas mapalambo ang kahibalo bahin sa mga benepisyo sa breastfeeding ug masiguro nga ang mga bata makadawat sa gikinahanglang nutrisyon sa unang mga yugto sa ilang kinabuhi.
