BUTUAN CITY- Patay ang labing menos lima ka pasyente sa National Kidney and Transplant Institute kon NKTI tungod sa leptospirosis, samtang 19 na ka kaso ang natala sukad Hunyo, human sa sunod-sunod nga pag-ulan ug pagbaha nga dala sa Habagat.
Sumala sa mga doktor, daghang pasyente ang nadala sa ospital nga grabe na ang kahimtang tungod dili dayon mamatikdan ang unang sintomas sama sa hilanat, kasakit sa lawas ug mga lutahan, ug pagpula sa mga mata.
Sa mas grabe nga kaso, mahimong mosangpot kini sa pagpanilaw sa panit o mata, pagkunhod sa ihi ug pag-ubo o pagsuka og dugo. Samtang sa San Lazaro Hospital, mikabat na sa 50 ang kaso sa leptospirosis, lakip ang 24 ka bag-ong pasyente nga na-admit sulod lang sa 24 oras, diin duha na ang namatay.
Nagpasidaan usab ang mga doktor nga posibleng mosaka pa ang kaso tungod mahimong moabot og duha hangtod 30 ka adlaw ang incubation period sa sakit. Gipahinumdoman usab ang publiko nga likayan ang paglusong sa baha, ilabi na kung adunay samad, ug kung dili malikayan, magsul-ob og rubber boots ug tabonan pag-ayo ang mga samad aron malikayan ang impeksyon.
