BUTUAN CITY – Gipahibalo ni US Treasury Secretary Scott Bessent nga magpatuman ang Washington og pinakabug-at nga sanctions sa kasaysayan batok sa Iran aron mapaluya ug malumpag sa gobyerno sa maong nasod.
Gi-awhag usab niya ang ubang nasod, lakip ang China, nga mu-apil sa maong paningkamot.
Apan gisaway sa China ang gitawag sa US nga “economic D-Day” batok sa Iran, ug mipahimangno nga ang dugang nga sanctions dili makasulbad sa nagpadayong mga panagbangi.
Gikondena usab sa Iranian Foreign Ministry ang hulga sa US nga bag-ong economic sanctions, nga gihulagway niini nga illegal ug dili tawhanon.
Samtang, sumala sa US Central Command o CENTCOM, 67 ka commercial vessels ang ilang gibalhin og ruta, tulo ang gi-disable ug duha ang gi-board samtang gi-usab ang gibalik nga naval blockade batok sa mga barkong moadto o mugikan sa mga pantalan sa Iran. .
