BUTUAN CITY- Nakuha sa mga doktor sa Sri Lanka ang 3.1-kilogram nga bato sa pantog sa usa ka 55-anyos nga lalaki, kansa giisip nila nga pinakadako nga bladder stone nga ilang natangtang pinaagi sa operasyon.
Nadiskubre kini human ma-confine ang lalaki tungod sa stroke ug nakasinati og kalisod sa pag-ihi, diin nakit-an sa mga doktor ang dakong bato sulod sa iyang urinary bladder ug sa operasyon sa usa ka ospital sa Trincomalee, Eastern Sri Lanka, natangtang ang bato nga gibug-aton sama sa usa ka masuso ug adunay gidak-on nga susama sa itlog sa ostrich.
Sumala ni Dr. Prahalahan Balakrishnan, posibleng nagpuyo ang bato sulod sa lawas sa pasyente sulod sa lima hangtod 10 ka tuig, samtang maayo ang kahimtang sa lalaki ug padayon pa nga nagpaayo human sa operasyon.
Ang bladder stone mabuo kung ang minerals sa urine crystallise magtapok, nga mahimong hinungdan sa kalisod sa pag-ihi kung modako.
Samtang sumala sa Guinness World Records, ang kanhi rekord sa pinakadakong bladder stone nga natangtang 1.9 kilograms ug 17.9 sentimetros ang gitas-on, nga natala sa Brazil niadtong 2003, kumpara sa 3.1-kilogram nga bato nga nakuha karon sa Sri Lanka nga adunay gitas-on nga 17 sentimetros.
