BUTUAN CITY- Duha ka estudyante ang kompirmadong patay lakip ang mismong suspek sa pagpamusil sa Ateneo de Zamboanga High School Campus kaganihang buntag, Martes, Agosto 18.
Base sa initial report gikan sa Regional Director sa Police Regional Office (PRO) 9, naila ang biktima nag si Patrick Dylan Wee, grade 10 student kinsa nakit-an nga wala nay kinabuhi sa ika-upat nga andana samtang ang suspek nga nailang si Mohammad Mael Jalani, Grade 9 student kinsa nagpusil sa iyang kaugalingon sa ika-lima nga andana human gihimo ang krimen.
Minggawas sa imbestigasyon nga gihimo sa suspek ang pagpamusil sa may alas-7:50 sa buntag nga walay klarong probokasyon ug nagpaboto sa pusil sa mga estudyante sulod sa mga classrooms.
Gigamit sa suspek sa pagpamusil ang usa ka pistol ug rifle.
Nagpadayon usab ang gihimong imbestigasyon sa Regional Forensic Unit 9 Scene of the Crime Operations (RFU9-SOCO) sa pakigtimbayayong sa Zamboanga City Police Station 6 (ZCPS 6) sa nahitaboang insidente.
Naglusad na usab og parallel investigation ang law enforcement agency lakip ang CIDG Zamboanga City Field Office aron matumbok ang background ug profile sa suspek, kung gi-unsa pagsulod sa campus ang mga pusil, masuta ang mga tag-iya sa pusil ug legalidad sa mga pusil, ingon man masuta ang mga biktima ug kung adunay pagpabaya sa parte sa pamunuan sa eskwelahan
