BUTUAN CITY- Mingsaka na sa 27 ang ihap sa mga namatay tungod sa padayong epekto sa habagat.
Sa usa ka press briefing kagahapong adlawa, gikomperma ni PNP spokesperson PCol. Allen Rae Co nga 26 sa mga namatay sibilyan samtang ang usa PNP personnel. Gitaho usab sa PNP officer nga aduna pay duha ka indibidwal ang missing samtang 18 ka-tao na ang gikatahong naka-angkon og injuries base sa datos kagahapon sa buntag Lunes, Agosto 17.
Gikatakda usab nga maghatag og complete details ang national police kalabot sa mga namatay kung asa ug unsa ang hinungdan sa ilang kamatayon. Samtang, padayon usab ang pag-asiste sa PNP sa disaster response dungan sa pagmintinar sa kaayohan ug kalinaw sa mga lugar nga apektado sa bug-at nga pag-uwan.
Base usab sa datos sa Office of the Civil Defense (OCD) kagahapon, kapin lima ka milyon ka-tao ang apektado sa hini-usang epekto sa mga bagyo nga mingkuso-kuso sa nasud ug habagat. Natala ang mga apektadong pamilya sa Ilocos Region, Cagayan Valley, Central Luzon, Bicol, Western Visayas, Zamboanga Peninsula, Cordillera Administrative Region, Metro Manila ug Mimaropa.
