BUTUAN CITY – Sugdan na ugmang adlawa sa House of Representatives ang paghisgot sa proposed ₱7.2 trilyones nga national budget alang sa tuig 2027 kondiin unang muhatag og briefing ang Development Budget Coordination Committee o DBCC kabahin sa tinubdan sa pondo, gidak-on sa gasto, ug mga budget proposals sa mga departamento, ahensya ug government-owned and controlled corporations.
Sumala ni Manila Rep. Bienvenido Abante Jr., ang gisumite sa Kongreso mao pa lamang ang National Expenditure Program o NEP, nga bersyon sa ehekutibo sa proposed budget ug dili pa kini ang final national budget tungod kay kinahanglan pa kining hisgutan ug aprubahan sa Kamara ug Senado.
Lakip sa adunay dagkong alokasyon ang Department of Education kon DepEd nga mu-abot sa ₱976 bilyon, Department of Public Works and Highways kon DPWH nga mu-abot sa ₱644 bilyon, lakip ang kapin ₱100 bilyon alang sa flood control, ug health sector nga ₱353.8 bilyon alang sa Department of Health kon DOH ug Philippine Health Insurance Corporation kon PhilHealth. Ang Department of Interior and Local Government kon DILG adunay ₱332.5 bilyon, samtang ang Department of National Defense kon DND, aduna’y ₱328.8 bilyon, samtang ang transport sector duna’y ₱302.2 bilyon, ug ang agriculture sector duna’y ₱261.7 bilyon.
Kung ma-aprubahan sa duha ka kapulungan sa Kongreso ug mapirmahan sa Presidente, mahimo na kining balaod ug tawgon kini nga General Appropriations Act, o national budget sa nasud.
