BUTUAN CITY- Nanawagan ang Iran sa Estados Unidos nga dawaton ang kapildihan ug undangan ang paghulga samtang nagpabiling sirado o hugot nga kontrolado sa Tehran ang Strait of Hormuz, usa ka estratehikong agianan sa lana sa kalibotan.
Sumala ni Iranian Deputy Foreign Minister Kazem Gharibabadi, ang pag-abli ug pagsira sa maong agianan anaa sa mando sa Iran, samtang si US President Donald Trump mingbutyag nga kinahanglan andam ang mga Amerikano sa mas taas nga presyo sa gasolina samtang nagpadayon ang gubat.
Sa datos sa ship-tracking firm Kpler, pipila lamang ka mga barko ang nakalatas sa Strait of Hormuz, layo sa kapin 130 ka barko kada adlaw sa wala pa ang gubat.
Tungod niini, misaka usab ang presyo sa krudo sa international market, samtang ang kasabutan alang sa kalinaw tali sa US ug Iran napakyas ug wala pay klarong petsa sa pagbalik sa negosasyon.
Nagpadayon usab ang pag-atake sa mga barko sa maong rehiyon, lakip ang duha ka barko sa Abu Dhabi nga giatake samtang milabay sa Strait of Hormuz, nga nagdugang sa kabalaka nga mahimong mokatag pa ang gubat sa Middle East.
