BUTUAN CITY – Nabutang sa alanganin ang Alas Pilipinas Girls human sila napildi sa World No. 6 nga Peru sa preliminary round sa FIVB Volleyball Girls U17 World Championship nga gihimo sa Liceo Mixto San Felipe sa Chile.
Bisan pa og nakuha sa Alas Girls ang unang set, wala nila mapadayon ang ilang momentum ug napildi sa sunod tulo ka sets.
Tungod niini, kinahanglan karon nga madag-an sa Alas Pilipinas Girls ang ilang kataposang duwa batok sa Venezuela aron makasulod sa Round of 16 ug magpabilin ang ilang higayon nga makigkompetensya alang sa kampeonato.
Ang Alas Girls ug Venezuela parehong adunay 2-2 nga record ug nag-ambit sa ikatulong puwesto sa Pool B.
Nanguna sa grupo ang defending champion nga China nga adunay hingpit nga 4-0 nga rekord, samtang ikaduha ang Peru nga adunay 3-1.
Ang top four teams gikan sa unom ka teams sa matag pool ang makasulod sa Last 16.
Aduna usa’y higayon ang Mexico nga makasulod sa sunod nga hugna bisan pa og naa sila sa ikalimang puwesto nga adunay 1-3 nga rekord.
Kinahanglan nilang pildihon ang Tunisia sa tulo o upat ka sets aron mapadayon ang ilang paglaom nga makakuha og ticket sa Round of 16.
