BUTUAN CITY – Mihinay sa 6.2% ang inflation rate kon kinatibuk-ang pagsaka sa presyo sa mga produkto ug serbisyo sa Pilipinas niadtong Hulyo ning tuig 2026.
Sumala sa Philippine Statistics Authority (PSA), ang nag-unang hinungdan sa paghinay sa inflation mao ang mas ubos nga pagsaka sa gasto sa sektor sa transportasyon.
Nasayrang ang tinuig nga pagsaka sa transport index, mihinay ngadto sa 11.9% niadtong Hulyo gikan sa 12.8% niadtong Hunyo ning tuiga.
Nakatampo usab sa paghinay sa kinatibuk-ang inflation ang mas hinay nga pagsaka sa gasto sa mga serbisyo sa edukasyon, mga restawran, ug accommodation services.
Sa bahin sa food inflation, nagpabiling 5.3% kini niadtong Hulyo 2026.
Nakatabang usab ang padayon nga pag-ayo sa suplay sa bugas nga maoy hinungdan sa pagkunhod sa presyo niini matag-bulan, bisan pa sa mga hulga sa El Niño.
Bisan og mikunhod ang inflation gikan sa 6.4% niadtong Hunyo, nagpabilin gihapon kini nga mas taas kaysa target sa gobyerno nga 2% hangtod 4%.
Ang paghinay sa inflation gika-ingong naapektuhan usab sa mga lakang sa Bangko Sentral ng Pilipinas (BSP), nga nagpataas sa interest rates aron mapugngan ang padayon nga pagsaka sa presyo sa mga palaliton.
