BUTUAN CITY- Gi-insistar sa kampo ni Vice President Sara Duterte nga adunay pagklaro matud pa ang paspas nga paggasta sa P125 million nga confidential funds sa Office of the Vice President (OVP) sulod sa 11 ka adlaw niadtong Disyembre 2022.
Sa usa ka press conference, sigon ni defense counsel Atty. Michael Poa nga adunay pagklaro ang OVP kalabot sa maong disbursement mao nga dili sila mosugot sa stipulation sa prosekusyon nga nagasto ang P125 million sulod lang sa 11 ka aldaw nga walay dugang pagklaro.
Sumala pa ni Poa, gusto sa depensa nga adunay cross-examination aron ipasabut ang paggamit sa confidential funds.
Bisan paman, sigon niini nga ming-uyon ang ilang kampo nga dawaton isip stipulated facts ang pipila ka dokumentong gisumite sa OVP sa Commission on Audit (COA).
Sa hearing sa impeachment trial, mingtestigo si kanhi COA-Intelligence and Confidential Funds Audit Office state auditor Roderick Wamil, kinsa gipa-atubang sa House prosecution aron ipasabot ang mga nahimong findings sa COA sa paggamit sa confidential funds sa OVP.
Matud pa ni Poa, wala na gikatinga sa depensa ang testimonya ni Wamil tungod ang mga niini nakabase lang sa mga nag-unang findings sa COA.
Dugang pa sa depensa, ang nahimong papel sa testigo mao ang ilhon ug ipasabot ang mga nadiskobrehan sa COA, ug wala matud pay bag-ing impormasyon nga wala pa nila nabasa sa mga audit findings.
