BUTUAN CITY – Duha ka tripulante ang namatay human nagbangga sa ere ang duha ka helicopter nga gi-arkila gikan sa Australian company nga McDermott Aviation, samtang gikumpatihan ang pagpalong sa dakong sunog sa lasang sa utlanan sa Attica ug Boeotia sa Greece .
Ang mga namatay mao ang usa ka Danish nga piloto ug usa ka Greek fire service liaison officer samtang naluwas ang usa ka British pilot ug laing Greek coordinator nga sakay sa ikaduhang helicopter.
Nahitabo kini mga 65 kilometro sa kasadpan sa capital Athens, kondiin ang usa sa duha ka Bell helicopters nabangga sa rotor blades sa pikas helicopter hinungdan sa pagkasunog ang usa ka helicopter ug nahagsa sa usa ka pangpang o bangag, samtang ang ikaduhang helicopter nakahimo og emergency landing.
Nagsugod ang mga wildfire sa Greece ning mi-aging semana hinungdan sa mass evacuation sa daghang residente. Dili lang ang Greece ang na-apektuhan tungod kay ubang mga nasod sa Urupe usab, nag-atubang sa grabeng mga sunog tungod sa dugayng heatwave.
Ang mga tripulante sa usa ka helicopter naluwas nga buhi, apan ang sakay sa ikaduhang helicopter nakuha nga wala nay panimuot ug gideklara nga patay.
Nagpadayag na sa iyang kasubo si Greek Prime Minister Kyriakos Mitsotakis ug nagpa-abot sa iyang pahasubo ngadto sa mga pamilya sa mga namatay tungod sa maong trahedya.
