BUTUAN CITY – Target sa Department of Budget and Management kon DBM nga isubmite ang 7.2 trilyones pesos nga nasudnong pondo para sa sunod nga tuig sa Agosto 14.
Ang target nga pagsumite sa National Expenditure Plan (NEP) para sa 2027 duha ka semana human ang ikalimang State of the Nation Address (SONA) ni Pangulong Ferdinand Marcos Jr. niadtong Hulyo 27. Sulod usab kini sa gitakda sa balaod nga 30 ka adlaw sukad nga giablihan ang regular legislative session nga dungan sa SONA.
Una nang gitakda sa Development Budget Coordination Committee (DBCC) nga gipangunahan sa DBM ang nasudnong badyet sa sunod nga tuig sa 7.2 trilyones pesos o bugti sa 21.7% sa gross domestic product (GDP) sa nasud.
Mas taas usab og 6 porsiento ang sugyot nga pondo sa 2027 kumpara sa kasamtangang P6.793 trilyong badyet ning tuig 2026.
Sumala ni Budget Secretary Kim Robert de Leon, nakapokus ang sugyot nga pondo sa sunod nga tuig sa mga programa, aktibidad ug proyekto nga nagtumong nga makamugna og mas maayong oportunidad ug matubag ang panginahanglan sa katawhang Pilipino, makatabang aron maseguro ang mas lig-on ug garantisadong kaugmaon para sa tanan.
Gi-angkon usab sa kalihim ang hagit sa paghimo sa pondo para sa fiscal year 2027 lakip na ang gamay nga fiscal space tungod sa funding pressures gikan sa awtomatikong apropriated items sama sa mga parte sa LGU sa National Tax Allotment ug mga bayad sa interes, lakip na ang mga kinahanglan sa mga bag-ong napapasar nga balaod ug mga balik-balik ngaa mandatoryong gastusan.
Ang National Expenditure Program (NEP) mao ang plano sa paggastos sa nasudnong kagamhanan alang sa musulod nga tuig.. Kini usab ang nagsilbing basehan para sa General Appropriations Bill (GAB).
Giendorso sa Kongreso ang naaprubahang bersyon niini sa Pangulo aron pirmahan, nga mahimong General Appropriations Act (GAA) na o ang opisyal nga balaod sa nasudnong pondo.
