BUTUAN CITY -Halos 100 na ka mga tawo sa 17 ka estado ang nasakit tungod sa salmonella outbreak nga may kalabutan sa gipang-recall nga mga itlog.
Sumala sa mga federal health officials, ang 98 ka kaso nagsugod tali sa Nobyembre 21 ug Hunyo 30, base sa datos sa U.S. Food and Drug Administration kondiin wala’y na-report nga namatay, apan 26 ka pasyente ang na-admit sa ospital.
Gi-ila sa mga imbestigador nga ang mga itlog nga gi-recall sa Midwest Poultry Services nga maoy posibleng tinubdan sa bakterya, bisan pa nga dili tanan nga kaso makasumpay sa kompanya nga nakabase sa Indiana.
Gi-recall sa Midwest Poultry ang mga itlog nga gikan sa mga uma sa Texas tali sa Hunyo 6 ug Hulyo 3 kansa gibaligya ubos sa daghang brand names ug adunay sell-by o best-by dates tali sa Hulyo 20 ug Agosto 17.
Ang mga sample nga nakolekta sa Midwest Poultry sa mga uma sa Texas nagpositibo sa salmonella, ug ang genetic testing nagpamatuod nga ang pipila sa mga sample mitukma sa bakterya nga nakapasakit sa mga tawo.
Gipahimangnoan ang mga konsumidor nga susihon ang ilang refrigerator ug ilabay o ibalik sa tindahan ang gi-recall nga mga itlog aron makakuha og refund.
Ang mga sintomas sa salmonella poisoning naglakip sa diarrhea, hilanat, grabe nga suka, dehydration ug kasakit sa tiyan. Kasagaran makabawi ang mga pasyente sulod sa usa ka semana, apan mahimong grabe ang impeksyon sa mga bata, tigulang, ug mga tawo nga hinay ang immune system nga mahimong manginahanglan og pagpa-ospital.
