BUTUAN CITY- Nadakpan na sa Philippine National Police (PNP) ang tulo sa upat ka mga suspek sa pagpatay sa usa ka American marine biologist nga si Kent Carpenter sa Sibulan, Negros Oriental.
Sumala ni Regional Director of Police Regional Office Negros Island Region Police Brigadier General Romano Cardiño, nga akip sa nadakpan ang giingong gunman nga si alias M.O., 26 anyos, si alias J.F. ang suspek nga giakusahan usab sa pagpanamastamas sa live-in partner sa biktima ug nasuta nga kanhi na usab kining nagtrabaho sa mga biktima hinungdan nga dali ra niining nahibaluan ang detalye sa maong panimalay, ug ang giingong lookout nga si alias C.D, samtang nagpadayon pa ang operasyon aron madakpan ang nahibiling suspek.
Si Carpenter, 73 anyos, gipusil sa ulo sulod sa iyang panimalay niadtong Domingo sa gabii human gisulod sa mga armadong lalaki. Nailhan kini sa iyang mga pagtuon bahin sa coral reefs ug marine biodiversity, nga nakatampo usab sa kaso sa Pilipinas sa 2016 arbitral ruling bahin sa West Philippine Sea.
