BUTUAN CITY- Luwas nga na-rescue ang usa ka 18-anyos nga babaye human kini giingong milukso gikan sa Magsaysay Bridge sa Purok 6-C, Barangay Buhangin, Butuan City, alas 8:30 sa buntag.
Sumala ni PSgt. Edmar Boque, residente sa Purok 7 sa maong barangay, nakabantay kini nga nagkatigom ang daghang tawo sa taytayan samtang paingon kini gikan sa iyang tindahan. Sa dihang iyang gisusi ang nahitabo, nakita niini ang biktima nga nga motunga ug maunlod na usab. Sigon pa ni Boque, nga sa pagkita niya sa sitwasyon wala na dayon kini magduha-duha sa pagtabang ug nangita una og kawayan nga mahimo unta niining kapyutan aron masiguro ang ilang kaluwasan, apan tungod kay walay makita, dali dayon niining gilangoy ang biktima.
Dugang ni PSgt. Boque, nga human kining mahaw-aw sa tubig daw sige og hilak ang biktima dalang pagmahay sa gibuhta. Gani atol sa pakighimamat niini sa parente sa biktima nasayran nga nakaagi kini og grabe nga panaglalis uban sa iyang amahan human kini wala makatambong sa eskwela tungod sa iyang gibating dili maayo, ug giakusahan pa kini nga maoy hinungdan sa kamatayon sa iyang inahan. Tungod sa emosyonal nga kasakit ug padayon nga pagbadlong, didto na matud pa naka huna-huna og ambak ang biktima sa maong tulay.
Human sa insidente, gihatagan dayon ang 18-anyos nga babae og tabang ug gitugyan sa City Social Welfare and Development aron maatiman ug mahatagan og hustong psychosocial intervention.
