BUTUAN CITY – Nakadawat og hinanaling apela alang sa pagpreserbar ang Local Government Unit sa Magallanes, Department of Tourism (DOT), Department of Environment and Natural Resources (DENR), og National Commission for Culture and the Arts (NCCA) human hingpit nang natumba ang bantugang Bitaug Centennial Tree, usa sa labing iladong simbolo ug makasaysayang landmark sa lungsod sa Magallanes, alas 5:25 sa hapon niadtong Hulyo 13, 2026.
Lakip niini ang pag-amping sa mga sample sa iyang dakong mga sanga, dahon, ug kahoy sa dili pa kini hingpit nga madugta, ang pagpanalipod sa mga liso ug iyang mga similya aron ang direktang kaliwat niining gatosan ka tuig nga higante kahoy magpadayon sa pagpuyo alang sa musunod nga henerasyon og ang pag-awhag sa mga awtoridad sa paggahin og dapit o exhibit sa museum nga magpasundayag niining mga kabilin, aron masiguro nga ang panumdoman sa Punoan sa Bitaug magpabilin hangtod sa kahangtoran sa kasaysayan.
Nasayrang base sa impormasyon, ang kahoy natumba tungod sa grabeng pagkadaot ug pagkaluya sa punoan niini, nga gituohang resulta sa kadugayon sa iyang pagkatindog sulod sa daghang siglo.
Hinoon walay natalang angol o nabiktima sa pagkatumba niini.
Nasayrang sulod sa daghang henerasyon, ang Bitaug Centennial Tree nahimong saksi sa kasaysayan ug daghang panumduman sa katawhan sa Magallanes, Agusan Del Norte.
Para sa daghang residente ug mga bisita, kini dili lamang usa ka kahoy, kondili usa ka bililhong simbolo sa panulondon ug identidad sa lungsod.
Alayonsa iyang pagkatumba, magpadayon nga mabuhi ang iyang kabilin ug ang mga istoryang iyang nasaksihan sa kasingkasing sa mga lumulupyo.
