BUTUAN CITY- Nasikop sa usa ka buy-bust operation sa kapulisan ang usa ka 15-anyos nga menor de edad nga giila isip High-Value Individual (HVI) sa Purok 4A, Barangay Doongan (Lower), Butuan City, alas 2:50 sa hapon niadtong Hulyo 12.
Ang operasyon gipahigayon pinaagi sa hiniusang paningkamot sa Regional Drug Enforcement Unit-13 (RDEU-13), Butuan City Police Office Drug Enforcement Unit ug BCPS2 Drug Enforcement Unit. Narekober gikan sa suspek ang 16 ka pakete sa gidudahang shabu, lakip ang usa ka sachet nga gipalit sa poseur buyer, nga adunay kinatibuk-ang gibug-aton nga gibana-banang 70 ka gramo ug adunay standard drug price nga P476,000.
Nakuha usab sa mga operatiba ang buy-bust money nga naglangkob sa usa ka tinuod nga P1,000 nga kuwarta ug unom ka peke nga P1,000 nga gigamit sa operasyon, uban sa nagkadaiyang drug paraphernalia ug uban pang mga ebidensya. Ang suspek ug ang tanang nakompiskang mga butang anaa na karon sa kustodiya sa RDEU-13 alang sa hustong dokumentasyon ug pagpasaka sa angay nga mga kaso.
