BUTUAN CITY – Opisyal nang gisugdan sa lokal nga kagamhanan ning siyudad sa Butuan ang rehabilitasyon sa Butuan City North kon Langihan Market human ang groundbreaking ceremony aron ayuhon ug bag-ohon ang usa sa mga nag-unang sentro sa pamatigayon sa dakbayan.
Sigon ni Butuan City Mayor Lawrence Lemuel ‘Law’ Fortun nga bisan nakasentro kini sa rehabilitasyon sa merkado, ang proyekto naglakip usab sa pagtukod og bag-ong fish landing facility nga mupalambo sa operasyon sa merkado, mopalig-on sa seguridad sa pagkaon, mopaasdang sa kalidad sa panglawas sa publiko, ug mosuporta sa panginabuhian sa mga lokal nga tindera ug mananagat.
Ang proyekto naglakip sa rehabilitasyon sa wet ug dry sections sa merkado, pagtukod og duha ka andana nga mixed commercial building, pag-upgrade sa mga pampublikong pansayannga mopuli sa kasamtangang istruktura.
Gidisenyo kini aron madoble ang kapasidad niini, ug ang maong moderno nga fish landing adunay mga pasilidad para sa cold storage
Sigon ni Mayor Law Fortun, dugay na kining gipa-abot alang sa kaugmaon sa ekonomiya sa Butuan.
Ang moderno nga publikong merkado dili lang manalipod sa panglawas sa publiko kondili magmugna usab og mas maayong oportunidad para sa mga tindera ug magpalig-on sa lokal nga ekonomiya.
Gipasalig usab niya ngadto sa mga tindera nga adunay ihatag nga temporaryo nga relocation sulod mismo sa lugar sa merkado samtang ongoing ang konstruksyon aron masiguro nga walay babag sa ilang inadlaw-adlaw nga pagpaninda.
