BUTUAN CITY – Nasaksihan sa Dapitan City ang pinaka-unang kasal sa tomboy ug bayot nga nakapukaw sa komunidad ug nakapa-ukyab sa social media.
Kini tungod kay ang kasal nila Ronnie Enderez ug Tisha Marie Enderez sa Saint James the Greater Parish, paspas nga misikat sa ilang lungsod ug nag-viral pa sa social media tungod kay gawas nga sila membro sa Lesbian, Gay, Bisexual, Transgender and Queer kon LGBTQ+, nagbaylo pa usab sila pustora kondiin si Ronnie maoy nahimong bride samtang si Tisha ang nahimong groom base sa ilang suot.
Sa pag-make up pa lang kang Ronnie, gitangtang ang iyang bangas ug siya ang gipagwapahan hangtud nga babaye na gayod siyang tan-awon ilabian nga sila ang nagsuot og gown.
Samtang si Tisha ang gipasuot og Barong Tagalog ug gikasal sila ni si Msgr. John Warren Maratas kinsa wala’y daghang kiyaw-kiyaw bisan og membro sa LGBTQ+ ang duha tungod kay sa mata sa mga tawo, babaye ug lalaki man sila rason nga alang sa officiating priest, kini matud pa ang pinaka-maayong ehemplo sa panutlihong “love knows no boundaries.”
Sa ilang vows, misaad sila nga magpili sa usag-usa hangtod sa kamatayon, bisan pa sa mga pagsulay ug paghukom sa uban.
