BUTUAN CITY – Gi-angkon sa West Papua National Liberation Army (TPNPB) nga ilang napusilan-patay si American pilot Nicholas Gosselin ug gisunog ang iyang eroplano sa Highland Papua province.
Sigon sa mga rebelde, kini usa ka mensahe aron ipakita nga ang mga sibilyan nga piloto nagtabang sa pagdala sa mga tropa sa Indonesia ngadto sa rehiyon.
Gikumpirma usab sa mga Indonesian officials nga nasunog ang eroplano ni Gosselin sa Yahukimo region airport, apan wala pa’y klaro ang kahimtang sa piloto ug sa pito ka pasahero nga sakay.
Sigon sa civil aviation authority, wala’y security concerns sa pag-landing, apan nawala ang komunikasyon pagkahuman niini.
Nahitabo kini taliwala sa dugay na nga bangi sa gobyerno sa Indonesia ug sa mga lumad sa West Papua nga nangayoig kaugalingnan alang sa rehiyon nga abunda sa mga rekursos naturales.
