BUTUAN CITY- Nagpasidaan ang United Nations (UN) nga mahimong moabot sa 3.6 bilyones dolyares ang kadaot sa ekonomiya sa Africa ug kapin 328,000 ka trabaho ang mahimong mawala kung dili dayon mapugngan ang kasamtangang Ebola outbreak.
Sumala sa UN, ang pagkatap sa Bundibugyo strain sa Ebola, wala pa’y aprubadong bakuna ug mahimong mosangpot sa usa ka dakong krisis sa panglawas ug ekonomiya.
Sa datos sa Democratic Republic of Congo, misaka na sa 1,307 ang nataptan ug 377 ang namatay sukad gideklarar ang outbreak niadtong Mayo 15, samtang aduna na usab mga kaso sa Uganda ug posible pang mokatap ang virus sa kasikbit nga mga nasud.
Sigon sa United Nations Development Programme kon UNDP nga kon dali nga mahatagan og igo nga suporta ug pondo ang mga apektadong lugar, mahimo pa nga mapugngan ang outbreak, apan kung mapakyas kini, mahimong mosangpot sa dugayng krisis nga makadaot sa kalamboan sa tibuok rehiyon sa Africa.
