BUTUAN CITY- Gipadayag ni Rosijane Palmer, Bombo International Correspondent to United Kingdom, nga daghang mga botante sa United Kingdom ang wala makabati sa gipaabot nilang dinaliang kausaban sa ilang adlaw-adlaw nga panginabuhi, hinungdan nga misaka ang pagkadismaya sa administrasyon ni Keir Starmer nga nagtukmod usab kaniya nga mokanaog sa pwesto isip UK Prime Minister.
Sa eksklusibong pakighinabi sa Bombo Radyo Butuan, gibutyag ni Palmer, nga nagpabiling dakong problema ang taas nga cost of living tungod sa padayon nga pagsaka sa bayronon sa enerhiya, abang sa balay, pagkaon ug uban pang batakang panginahanglan, samtang daghan usab ang nagtan-aw nga hinay ang mga lakang sa gobyerno sa pagpausbaw sa minimum wage ug pagpakunhod sa gasto sa kuryente.
Dugang pa niini, nagpabilin nga sensitibong isyu usab ang immigration nga nakahatag og dugang presyur sa politika sa nasud. Bisan pa man, giila ni Palmer nga adunay mga nahimo ang Labour Party ubos sa liderato ni Starmer, apan alang sa daghang mga botante nga misuporta kanila niadtong 2024, kulang pa gihapon ang kadasig sa mga reporma nga ilang gilauman nga makahatag dayon og positibong epekto sa ekonomiya ug sa nasudnong serbisyo sa panglawas.
Dugang pa ni Palmer, nga sa kasamtangan wala pay kasiguraduhan kung si Andy Burnham ang mohulip kang Starmer tungod padayon pa nga nangita ang mga tag-as nga opisyal sa United Kingdom. Matud pa niini, nga daw karun o sunod nga mga adlaw ayha pa i-anunsyo ang opisyal nga mo hulip kang kanhi Prime Minister Starmer sa iyang posisyon isip Prime Minister sa United Kingdom.
