BUTUAN CITY- Mipakita og kusog nga dominasyon ang Spain human nilang gipildi ang Saudi Arabia, sa sakor nga 4-0, alang sa Group H sa FIFA World Cup 2026 nga gihimo sa Atlanta, Estados Unidos.
Nanguna gilayon ang Spain pinaagi kang Lamine Yamal sa ika-11 minuto sa unang bahin sa duwa, gisundan sa duha ka sunod-sunod nga goal ni Mikel Oyarzabal aron mapalapad ang ilang abante. Nadugangan pa ang kalisdanan sa Saudi Arabia sa ikaduhang hugna sa dihang nakahimo og own goal ang ilang depensa, nga maoy mitakda sa pinal nga iskor.
Tungod sa maong kadaugan, napalig-on sa Spain ang ilang kampanya alang sa pagsulod sa sunod nga hugna sa torneyo, samtang ang Saudi Arabia napugos sa pagpangita og maayong resulta sa ilang sunod nga duwa aron mapadayon ang paglaum sa pag-abante sa kompetisyon.
