BUTUAN CITY- Nagpabiling nakatakda sa Hulyo 6 ang pagsugod sa impeachment trial ni Vice President Sara Duterte bisan pa sa nagpadayong pre-trial proceedings sa Senado, sumala ni House prosecutor ug Akbayan Party-list Rep. Chel Diokno.
Sigon ni Diokno nga gilauman nilang mahuman sulod niining semanaha ang proseso sa pagmarka, pag-ila ug pag-organisa sa mga documented evidence nga ipresentar sa prosecution ug depensa atol sa pormal nga pagtaral. Gipasabot usab niini, nga ang mga panaglalis ug kalahi-an sa baruganan sa duha ka kampo panahon sa pre-trial usa ka normal nga bahin sa legal nga proseso, ug wala’y nahitabong dili kasagaran sa unang pre-trial conference nga gihimo niadtong Hunyo 18.
Samtang nagpadayon ang mga preparasyon alang sa impeachment trial, nagpabilin usab nga wala pa’y pinal nga desisyon kon kinsa ang mahimong presiding officer sa impeachment court. Gani, nahisgutan usab ang posibilidad nga si Senador Francis Escudero ang mangulo sa pagtaral, apan sigon sa liderato sa Senado nga kini padayon pang gihisgutan.
Matud ni Diokno, ang maong desisyon eksklusibong anaa sa Senado ug andam ang mga prosecutor nga motuman sa bisan unsang pinal nga desisyon niini, samtang gipadayon ang mga lakang aron masiguro ang hapsay ug patas nga pagdumala sa impeachment proceedings.
