BUTUAN CITY- Nagpagawas og bag-ong alegasyon ang mga bag-ng testigo nga gipa-atubang nila Atty. Levito Baligod ug kanhi Congressman Mike Defensor kalabot sa Maleta o cash delivery nga gilambigit sa isyu sa Flood Control budget. Lakip sa bag-ong testigo si Jeron Valderrama nga nagpa-ilang kanhi miyembro sa Philippine Marine Corps ug gi-ingong nahimong bodyguard ni kanhi Rep. Zaldy Co. Sumala ni Valderrama, nasaksihan matud pa niini ang paghatag sa labing-minus P10 milyon nga nakabutang sa hand carry bag kang Commission on Election Chairman George Erwin Garcia. Hugot usab nga gilimod ni Garcia ang maong alegasyon nga mingdawat kini og kwarta nga adunay kalabotan sa Flood Control kickback controversy.
Sumala ni Garcia, nga puros bakak lang matud pa ang mga alegasyong gipasangil batok niini. Gi-insistar usab niini, nga wala nagkonektar ang mga pamahayag sa mga testigo, diin matud pa niini, nga sa unang pamahayag 4 matud pa ka maleta ang gihatag kaniya atubangan sa usa ka hotel apan sa kataposang pamahayag usa ka gamay nga hand carry nalang matud pa ang gibutyag.
Gawas kang Garcia, gilambigit usab sa mga alegasyon si Senator. Chiz Escudero, sumala sa pamahayag sa laing usa pa ka nagpa-ilang kanhi personnel ni Co, upat ka maletang adunay managlahing gidak-on ang gidala sa panimalay ni Escudero sa New Manila niadtong 2024. Gipadayag usab sa testigo nga human matud pa sa maong delivery gipakaon pa sila sa balay sa Senador kauban ang mga katabang sa balay. Gipakita usab sa mag testigo ang usa ka picture kung asa makita usab si Senator Kiko Pangilinan kauban ang iyang asawa nga si Sharon Cuneta.
Samtang mingpalag usab si Cuneta sa pamahayag sa kanhi bodyguard ni Co ug gi-ingong puros bakak ang mga alegasyon batok niini. Adunay gipakita usab nga hulagway kauban si MMDA General Manager ug kanhi PNP Chief Nicolas Torre. Sumala nila, kuha matud pa kini niadtong gi-awhag sila nga bawi-on ang mga unang pamahayag nila sa Senado. Samtang sigon usab sa mga kanhi bodyguard nga nakahatod matud pa sila og mga paper bag nga adunay sulod nga kwatra sa pipila ka personalidad sa media, lakip sila TV journalist Arnold Clavio ug kolumnistang si Mon Tulfo. Gani, gipanhimaka usab gilayon kini ni Clavio ug gihagit ang mga nag-akusar nga magpakita og ebidensya.
