BUTUAN CITY- Nagpadayon ang Philippine Health Insurance Corporation sa pagpalig-on sa pagpatuman sa Universal Health Care pinaagi sa estratehiyang gitawag og “smarter spending” aron masiguro ang malungtarong pondo alang sa nagkalapad nga mga benepisyo sa mga miyembro.
Sa usa ka forum, gipasiugda ni PhilHealth President ug Chief Executive Officer Dr. Edwin Mercado, nga ang paggasto sa panglawas dili angay tan-awon nga gasto lamang kondili usa ka puhunan alang sa kalamboan sa nasod, tungod kay ang himsog nga populasyon naghatag og mas produktibong trabahante ug mas lig-on nga komunidad.
Sumala niini, napaspasan sa PhilHealth ang pagproseso sa mga claims gikan sa hangtod 60 ka adlaw ngadto sa 10 hangtod 11 ka adlaw pinaagi sa digital upgrades, samtang gipalapdan usab niini ang sakop Yaman ng Kalusugan Program o YAKAP, primary care, dialysis, cancer treatment ug maternity services. Gipasabot usab niini, nga kapin P152 bilyon na ang nabayran sa PhilHealth gikan Enero hangtod Mayo ning tuiga, ug gilauman nga moabot kini sa halos P400 bilyon sa tibuok tuig.
Giduso sa mga eksperto ug lider sa sektor sa panglawas ang mas lig-on nga pondo, preventive healthcare, ug panaghiusa sa gobyerno ug pribadong sektor aron masiguro ang padayon ug malungtarong paghatag og serbisyo sa panglawas alang sa mga Pilipino.
