BUTUAN CITY – Gisiguro ni Department of Public Works and Highways kon DPWH Sec. Vince Dizon nga magsugod dayon ang pag-ayo sa naputol nga dalan sa parte sa General Santos City–T’boli–Surallah Road, Brgy. San Jose, T’boli, South Cotabato.
Kini human personal mga gisusi ni Sec. Dizon ang mga kalsada ug tulay nga na-apektuhan sa sunod-sunod nga linog sa General Santos City ug Sarangani Province.
Base sa inisyal nga imbestigasyon, ang mga pampublikong dalan ug tulay nga duol sa epicenter sa 7.8 magnitude nga linog mao ang pinakagrabe nga naapektuhan.
Sumala pa sa kalihim, mando ni Pangulong Ferdinand Marcos Jr. nga ipabilin nga luwas ang mga dalan alang sa mga motorista ug abli sa paghatod sa nag-unang tabang ug serbisyo sa mga komunidad nga na-apektuhan sa linog.
Gisiguro usab ni Regional Director Cayamombao Dia nga nagpadayon ang mga technical team gikan sa walo ka District Engineering Offices sa paghimo og damage assessment ug structural validation sa mga na-apektuhan nga imprastruktura aron masiguro ang mga kinahanglanong lakang.
