BUTUAN CITY- Daghang tawo ang nakakita og elephant sculpture sulod sa usa ka templo sa India ug gituohan nga kini milagrosong “holy water.” Gisudlan ug gipahid pa kini sa lawas sa mga deboto, samtang ang uban misulay pa og inom tungod sa ilang pagtuo nga kini makahatag og himala ug kaayohan.
Apan sa mas hugot nga pagsusi, nasuta nga ang tubig nga nagtulo gikan ra diay sa usa ka air conditioner nga nahimutang duol sa estatuwa ug dili gikan sa milagrosong tuburan.
Gipahimangnoan sa mga awtoridad ang publiko nga magmatngon ug dili dayon motoo sa mga panghitabo nga walay klarong basehan, tungod kay ang gituohang limpyo ug balaan nga tubig mahimong hugaw ug posibleng delikado kung imnon. Ang insidente nagpakita sa kamahinungdanon sa kritikal nga pagtan-aw ug pag-amping sa kahimsog, ilabi na sa mga lugar nga daghan og deboto ug bisita nga dali maapektuhan sa mga simbolikong panghitabo.
