BUTUAN CITY- Dako ang katinga sa usa ka mahistrado sa Sandiganbayan sa daghang gitaho nga nasinating sakit ni kanhi Department of Public Works and Highways kon DPWH Secretary Manuel Bonoan, kinsa lakip sa mga akusado sa kasong plunder ug graft kalabot sa anomalya sa flood control projects.
Sa gibuak nga dokumento ni Sandiganbayan Presiding Justice Geraldine Econg sa Second Division, lakip sa mga sakit ni Bonoan ang chronic kidney disease (CKD), prostate cancer, diabetes, hypertension, acute coronary syndrome, ug spine condition.
Ang kanhi DPWH secretary kasamtangang naka-confine karun sa The Medical City ug gikomperma usab kini sa pulisya.
Tungod niini, gihangyo sa korte nga mangayo kini og updated medical report gikan sa Philippine National Police (PNP) aron masuta ang tinuod nga kahimtang sa kanhi opisyal.
Kahinumdumang nag-atubang si Bonoan sa P573-million plunder and graft cases kalabot sa anomalosong flood control projects, kung asa lakip usab sa mga akusado si Senador Jinggoy Estrada ug uban pang mga kanhi opisyal sa DPWH.
Sumala sa Office of the Ombudsman, adunay kalabotan ang kaso sa daw kickback scheme sa mga flood control projects sa Bulacan.
Base sa maong reklamo, mingtabang matud pa si Bonoan sa pagproseso sa mga “commitment fee” alang kang Estrada, kansa gi-ingong minghangyo og P855 million nga pondo alang sa mga proyekto.
Gitumbok usab sa prosekusyon nga posibleng mo-abot sa 25% o P213.7 million ang nadawat matud pa nga senador gikan sa kinatibuk-ang kantidad sa proyekto.
Sumala pa sa mga piskal sa Ombudsman, si Bonoan usab ang daw adunay papel sa pagpili og mga kontratistang nakakuha sa maong mga proyekto.
Hugot usab nga gilimod ni Bonoan ug Estrada ang tanang mga alegasyon batok sa mga niini.
