BUTUAN CITY – Maghimo og try-out ang Ampayon Central Elementary School ning siyudad sa Butuan alang sa mga magtutungha nga gustong mu-apil sa arnis team nga karong tuiga, mihakot og mga bronze, silver ug gold medals sa nagpadayong Palaro Tu AgSur 2026.
Sa eksklusibong pakighinabi sa Bombo Radyo Philippines, gipadayag ni Eldridge Troy Go, arnis coach sa Ampayon Central Elementary School, nga sukad sa pagsugod sa ilang arnis team, ginapraktis na niya nga duna’y mabilin nga senior arnistas aron maoy mutabang pagtudlo sa mga bag-o ilabina kung mu-graduate na ang ilang mga grade 6 players.
Pa-apilon matud pa nila sa screening ug try-out ang mga grade 4 pupils ug ang mugawas nga duna’y best performance kanila, mao ang makasulod sa ilang arnis team sa babaye ug lalaki.
Pila ka adlaw gikan sa pagsugod sa klase, magsugod na usab ang training kondiin sa mga adlaw nga ukupado ang mga bata sa ilang klase, kinahanglan gihapon nga mag-train sila bisan og light lang sulod sa 30-minutos aron mamintina ang ilang timbang ug muscles.
