BUTUAN CITY- Magpabiling nakadetine sa The Hague si kanhi President Rodrigo Duterte samtang gihuwatan ang pagsugod sa iyang pagtaral kalabot sa kasong crimes against humanity, sumala sa International Criminal Court kon ICC.
Sumala sa desisyon sa International Criminal Court Trial Chamber III, dili igo ang gisumiting argumento sa depensa kalabot sa kahimtang ni Duterte aron ilisan ang unang findings sa court-appointed medical experts.
Pag-insistar sa korte, walay bag-ong ebidensya o dakong pagbag-o sa sitwasyon sa kahimsog sa kanhi Presidente nga maghatag og hinungdan alang sa iyang temporaryong kagawasan.
Gikonsiderar usab sa ICC ang iyang pagdumili sa pag-ila sa hurisdiksyon sa korte, kansa sumala niini nagpakita nga posibleng dili kini mosunod sa unsa mang mando sa korte kung buhi-an.
Dugang pa sa ICC, adunay “real and substantial risk” nga posible kining mo takas o babagan ang proseso sa hustisya tungod sa iyang impluwensya, ug koneksyon.
Kalabot niini, gihatagan sa korte og permisyon ang depensa nga dili una motambong si Duterte sa unang status conference nga gikatakda sa Mayo 27, basta magsumite lang og pormal nga hangyo.
Ang hearing hisgutan sa iskedyul sa pagtaral, mga ebidensya, ug uban pang preparasyon alang sa kaso.
Una nang gikomperma sa ICC Pre-Trial Chamber I ang mga kaso batok kang Duterte kalabot sa daw pagpatay sa iyang kampanya kontra droga niadtong kini pa ang Mayor sa Davao City ug sa ulahi isip presidente sa Pilipinas.
