BUTUAN CITY – Halos 50 ka indibidwal ang nawad-an og panimalay human sa natigayong sunog adiser mag alas-12:00 sa udtu kaganina sa may Purok-10, Barangay Km-3, ning siyudad sa Butuan.
Sa nakuhang impormasyon sa Bombo Radyo Butuan pinaagi sa mga residenteng apektado, muabot sa 10 ka panimalay ang na-ugdaw sa maong sunog diin ang kalayu nagsugod sa balay sa pamilyang Paler nga daling mikaylap og naapil ang mga panimalay sa pamilyang Pabia, Pasco, Curilan og Mendoza.
Nasayran usab nga nakahi-agum og mga paso sa kalawasan ang tag-iya sa panimalay diin nagsugod ang kalayu nga gidala na sa ospital.
Nakamat-ngon nalang matud pa kini gikan sa pagkatulog.
Sigon pa ni Ruel Pabia, nga gitawagan nalang siya sa iyang asawa samtang anaa sa trabahoan mahitungod sa pagkasunog sa ilang panimalay rasong nagdali siya sa pag-uli og na-abtan nalang nga naugdaw na ang maong mga panimalay.
Walay nasalbar sa ilang mga gamit apan naluwas hinoon ang tanang sakop niya sa pamilya.
Gikatingala usab niini ang maong sunog ilabina kay walay kuryente ang balay diin nagsugod ang kalayu.
Samtang gipasalamat nalang usab ni Nodeliane Degamon, nga wala ra nahurot sa pagkalamoy ang iyang panimalay bisan og dako gihapon ang damyos.
Saysay pa niini nga gipahibalo nalang siya sa maong insidente samtang anaa kini sa iyang panimalay usab sa Barangay Villa Kananga.
Samtang gikumpirma usab ni FSr. Insp. Ronald Vasquez, Acting City Firemarshall sa Butuan City Central Fire Station nga dunay usa ka angol sa maong sunog nga nailang si Levie Pasco.
Nadawat nila ang tawag sa alas 11:41 sa buntag og na kontrola ang kalayu sa alas 12:03 sa udtu. Padayon pa usab ang gihimong imbestigasyon apan nagpahimangno kini sa katawhan nga magbinantayon sa ilang panimalay.
Gipaneguro usab ni Kapitan Gemma Tabada nga dunay temporaryong kapuy-an ang mga apektadong indibidwal pinaagi sa evacuation center nga dili ra usab layu gikan sa nasunogan.
Sigon pa niini nga nag-andam usab sila og paniudtu samtang mohimo og assessment ang mga personahe sa City Social Welfare and Development kon CSWD.
