BUTUAN CITY – Direktang nanawagan si World Health Organization (WHO) Director-General Tedros Adhanom Ghebreyesus sa mga residente sa Tenerife, Spain nga magpabiling kalmado kalabot sa pag-abot sa cruise ship nga MV Hondius nga adunay kaso sa hantavirus.
Sigon sa opisyal, dili angay ikumpara ang sitwasyon sa COVID-19 pandemic ug hantavirus tungod kay ubos pa gihapon ang risgo niini sa publiko.
Aminado kining seryoso ang Andes strain sa hantavirus human namatay ang tulo ka pasahero, apan iyang gisiguro nga wala na’y nagpakita og sintomas sa mga sakay sa maong barko.
Gipasabot ni Tedros nga hugot ang plano sa Spain paghikling sa mga pasahero diin dad-on sila sa industrial port sa Granadilla ug diretsong ipapauli sa ilang tagsa-tagsa ka nasud nga dili makighugoy-hugoy sa publiko.
Nagpasalamat usab siya sa Spain ug sa mga residente sa Tenerife sa pagdawat sa barko isip kabahin sa international cooperation.
Sumala sa WHO Director, personal siyang miadto sa Tenerife aron bantayan ang operasyon ug nagpasalamat sa gipakitang pakig-uban sa mga residente ug awtoridad sa lugar.
