BUTUAN CITY- Gilusad sa Land Transportation Office kon LTO Surigao City ang Road Safety activities atol sa pagsa-ulog sa Road Safety Month 2026 aron mapalig-on ang kahibalo sa mga drayber ug motorista kabahin sa hustong pagmaneho ug pagpatuman sa balaod trapiko.
Gipangulohan ni Engr. Eugene Rula, Chief sa LTO-Surigao City, kauban si Jojo Paronia, Deputy Chief sa nasangpit nga ahensya, diin asa gipasabot ni Rula ang importansiya sa kaluwasan sa dalan aron malikayan ang mga disgrasya sa kadalanan.
Atol sa maong kalihokan, gilatag usab sa LTO ang nagkadaiyang hinungdan sa mga aksidente sama sa overspeeding, dili pagsul-ob og helmet ug seat belt, paggamit og cellphone samtang nagmaneho, pagdrayb nga hubog, ug sa wala pagsunod sa traffic signs ug regulations.
Giduso sa ahensya ang kooperasyon sa tanang motorista ug drayber aron mapadayon ang kaluwasan sa kadalanan ug malikayan ang pagkalas sa kinabuhi tungod sa mga disgrasya.
