BUTUAN CITY – Nahugno ang pro-European coalition sa Romania human sa vote of no-confidence batok sa Prime Minister Ilie Bolojan nga naghatag og kabalaka sa posibleng matigayong krisis- pinansyal.
Sa debate sa parliamento kaganina, 281 ka mga magbabalaod ang mibotar pabor sa motion ug upat lang ang kontra.
Ang motion gisugdan sa Social Democratic Party (PSD) nga mi-withdraw sa coalition niadtong Abril, ug sa far-right nga Alliance for the Unity of Romanians (AUR).
Ang mga kauban ni Bolojan sa National Liberal Party (PNL), Save Romania Union, ug UDMR, wala mibotar.
Bisan og wala pa’y klaro kung magpahigayon og snap election, ang merkado pinansyal nabalaka nga basin mutipas ang Romania sa plano nga pagkunhod sa pinakadako nga budget deficit sa European Union.
Ang currency nga leu misaka sa pinaka-ubos nga level kontra sa euro. Ang coalition nga nagsugod 10 ka bulan ang milabay gitukod aron pugngan ang kusog sa far right ug nakapakunhod gamay sa deficit.
Apan ang PSD, nga importante aron makamugna og pro-EU majority, pirmi nag-away kay Bolojan tungod sa austerity measures nga naka-apekto sa ilang mga botante.
