BUTUAN CITY- Tulo ka pasahero ang namatay human sa gituohang hantavirus outbreak sa MV Hondius cruise ship nga nagbiyahe gikan Argentina paingon sa Cape Verde.
Sumala sa World Health Organisation (WHO), adunay usa ka kumpirmado ug lima ka suspetsado nga kaso sa barko, samtang usa ka 69-anyos nga Briton ang gi-admit sa intensive care sa Johannesburg, South Africa. Ang hantavirus kasagaran makuha gikan sa mga i-laga pinaagi sa ilang hugaw, laway o ihi, ug makapahimo og grabe nga sakit sa baga.
Ang operator nga Oceanwide Expeditions mitug-an nga kini usa ka “seryosong medikal nga sitwasyon” ug nakumpirma ang tulo ka pagkamatay, lakip ang duha ka Dutch nga magti-ayon ug usa pa ka Dutch nga pasahero. Duha ka crew ang nanginahanglan og emerhensiyang tambal apan wala pa tugoti nga makanaog sa Cape Verde.
Ang barko, nga adunay kapasidad nga 170 ka pasahero ug 57 ka crew, karon naka-angkla sa gawas sa Praia, samtang ang mga awtoridad ug eksperto nagpahimangno nga posibleng mosunod pa ang dugang nga kaso tungod sa incubation period sa virus nga molungtad og usa hangtod walo ka semana.
