BUTUAN CITY- Gipadayon sa City Government of Butuan ang paghatag og cash assistance sa mga rice ug corn farmers nga naapektuhan sa miaging cropping season tungod sa El Niño phenomenon.
Kapin 300 ka mga mag-uuma ang nakabenepisyo sa maong programa, pinaagi sa pagtinabangay sa City Government of Butuan (CGB), City Agriculture and Veterinary Department (CAVD), ug Department of Agriculture–Philippine Crop Insurance Corporation (DA-PCIC).
Sumala sa pipila ka benepisyaryo, lakip sila Charlita Torralba ug Sergio Salagoste, dako ang ilang pasalamat sa padayon nga suporta sa gobyerno nga nakatabang aron makabangon ug makasugod pag-usab sa ilang pagpanguma.
Gipahigayon ang distribusyon sa cash assistance sa opisina sa CAVD isip kabahin sa mga lakang sa lokal nga gobyerno aron matabangan ang mga mag-uuma nga naapektuhan sa kalamidad.
Gipadayag usab sa City Government of Butuan nga magpadayon ang ilang mga programa ug inisyatibo aron pakusgan ang sektor sa agrikultura ug masuportahan ang panginabuhian sa mga mag-uuma sa syudad.
