BUTUAN CITY – Gikumpirma ni Atty. Krissy Conti, assistant to counsel sa International Criminal Court (ICC), nga naporma na ang Trial Chamber III nga maoy motutok sa kaso ni kanhi Pangulong Rodrigo Duterte may kalabotan sa giyera kontra droga.
Sumala ni Conti, ang ICC nagtudlo og tulo ka huwes nga gilangkuban nila Judges Joanna Korner, Keebong Paek, ug Judge Nicolas Guillou, aron paminawon ang maong kaso.
Ang mga mosunod nga lakang, pulos administratibo ug nagkinahanglan og koordinasyon tali sa mga legal teams sa prosekusyon, depensa ug mga biktima.
Tungod sa kamugnaan sa Trial Chamber III, posibleng adunay status hearing nga himuon sa private session sa umalabot nga mga adlaw.
Ang pagkatukod sa Trial Chamber, usa ka importante nga yugto sa proseso, kay kini mao ang magbukas sa pormal nga pagtaral diin hisgutan ang ebidensiya ug testimonya batok sa kanhi Pangulo.
Sa pagkakaron, gilauman ang mas hugot nga koordinasyon sa mga partido aron masiguro ang hapsay nga dagan sa proceedings.
Nagsugod ang imbestigasyon sa ICC sa Pilipinas human sa report nga libo-an ang namatay ubos sa kampanya kontra droga ni Duterte gikan niadtong tuig 2016 hangtod 2022.
Bisan pa sa pag-atras sa Pilipinas gikan sa Rome Statute niadtong 2019, gipamugos sa ICC nga aduna gihapon kini hurisdiksiyon sa mga krimen nga nahitabo samtang miyembro pa ang nasud sa maong international tribunal.
