BUTUAN CITY – Laumang moatubang sa pagdungog sa House Committee on Justice ang pipila ka tag-as nga opisyal sa gobyerno ug uban pang resource persons sa pagpadayon sa pagsusi sa impeachment complaint batuk kang Vice President Sara Duterte ugmang adlawa, Abril 22, 2026.
Sigon ni Justice Committee Chairperson ug Batangas 2nd District Rep. Gerville Luistro, lakip sa imbitahan sila Ombudsman Jesus Crispin Remulla, kanhe Senador Antonio Trillanes IV, mga opisyal sa Anti-Money Laundering Council (AMLC), ug uban pa aron maghatag katin-awan sa mga alegasyon batuk sa Bise Presidente.
Tumong sa pagdungog nga susihon ang matud pa kalit nga pagsaka sa bahandi ni Sara Duterte ug ang isyu sa dili matud pa tukmang pagdeklara sa iyang Statements of Assets, Liabilities and Net Worth (SALN), nga mamahimong masulod sa kasong “betrayal of public trust.”
Gilaumang magpresenta si Remulla og mga kopya sa SALN sa Ikaduhang Pangulo gikan sa nagkalain-laing tuig samtang si Trillanes usab maghatag og testimonya mahitungod sa iyang mga naunang alegasyon may kalabutan sa matud pa nakatagong bahandi ni VP Sara ug sa iyang amahan nga si kanhe Pangulong Rodrigo Duterte.
Kauban usab sa mga gi-imbitar si suspended Overall Deputy Ombudsman Melchor Carandang, lakip ang mga opisyal sa AMLC aron ipakita ang matud pa kadudahang bank transactions ni Sara Duterte ug sa iyang bana nga si Atty. Manases Carpio.
Gilauman usab nga motambong ang usa ka opisyal gikan sa Bureau of Internal Revenue (BIR) aron maghatag og impormasyon mahitungod sa income tax returns sa magti-ayon.
Gitumbok ni Luistro nga tumong sa pagdungog nga matumbok kung dunay igong “probable cause” aron mo-abante ang impeachment case batuk kang Vice President Duterte.
