BUTUAN CITY – Na-intercept sa US Navy ang Iranian-flagged cargo ship sa Gulf isip kabahin sa ilang naval blockade, base na sa pagkumpirma ni US President Donald Trump.
Sa iyang post sa Truth Social platform, gipadayag ni Trump nga na-intercept ang Touska human nga wala mitubag sa warning aron sila pahunungon apan wala pa gikumpirma sa Iran ang maong insidente.
Gi-anunsyo kini human gikumpirma sa White House nga si US Vice-President JD Vance ang manguna sa delegasyon alang sa ikaduhang hugna sa pakighinabi nga himuon sa Pakistan alang sa pagtapos sa giyera sa Iran ug base sa report sa Iranian state media, dili matud pa musalmot ang ilang mga opisyal samtang nagpabilin pa ang US blockade.
Dugang ni Trump, naghatag ang US og fair warning sa barko aron kini muhunong apan gibalewala lang, rason nga gipahunong gilayon kini sa ilang Navy ship pinaagi sa pagbangag sa engine room.
Nagpagawas na usab ang US Central Command og footage nga nagpakita sa usa ka naval vessel nga nag-intercept sa usa ka cargo ship.
Sa maong footage, makita nga usa ka armas ang mipa-arak padulong ngadto sa direksyon sa maong cargo ship.
