BUTUAN CITY- Dili mosugot si Eman Bacosa Pacquiao nga mahitabo ang posibilidad nga mag away sila sa ring sa iyang igsoon sa amahan nga si Jimuel Pacquiao.
Sumala ni Eman, walay bisan unsang rason nga makapaduso kaniya sa pagpakigsangka sa iyang igsoon sa boksing. Matod pa niini, dili lamang tungod kay igsoon niya si Jimuel, kundi tungod usab sa respeto sa ilang pamilya ug ilabi na sa ilang amahan nga si Manny Pacquiao. Gipunto ni Eman nga wala siyay makita nga kalipay kung mag-atubang sila sa usag usa bisan pa ug kinsa ang modaog o mapildi, ug dili usab niini gusto nga masakitan ang iyang amahan kung mahitabo kini.
Gipadayag usab ni Eman nga maayo ang iyang relasyon sa mga anak ni Manny ug Jinkee Pacquiao ug supportive sila sa usag usa sa ilang boxing career. Mahitungod sa iyang amahan, giingong suportado siya niini ug kanunay pahinumdoman nga mag-ampo ug magpaka-humble, bisan usahay ra sila magkaistorya tungod sa busy. Gisaysay usab ni Eman nga gusto niya makat-on sa teknik sa iyang amahan sa boxing ilabi na sa footwork ug timing.
