BUTUAN CITY -Usa ka lalaki gikan sa Mabalacat, Pampanga nakasinati og talagsaon nga insidente human niya aksidenteng matulon ang wire sa iyang braces samtang nagkaon og kakanin.
Sumala ni Vincent John Jocson, nabantayan niya nga nawala ang wire sa iyang braces human siya mitulon.
Nakasinati usab siya og grabeng kasakit sa iyang tutunlan, nga iyang gihulagway nga murag natunok.
Gisulayan niya og suka ang wire apan bisan unsaon niya og pugos, wala gyud kini mogawas.
Dali siyang gidala sa ospital diin gikumpirma sa mga doktor nga natulon gyud niya ang braces wire.
Gioperahan siya gamit ang usa ka tubo nga naay camera ug pang-ipit aron pangitaon ug kuhaon ang wire gikan sa iyang tutunlan.
Sumala sa mga eksperto, talagsa ra kini nga panghitabo ug delikado usab, labi na kung taas ang natulon nga wire kay posible kini makasamad sa sulod sa lawas.
Maayo nalang kay malampusong nakuha ang halos usa ka pulgada ug tunga nga wire, ug naka-recover si Vincent human magpabilin sa ospital sulod sa usa ka gabii.
Gipahimangnoan usab sa mga eksperto ang mga adunay braces nga likayan ang gahi nga mga pagkaon ug putlon ang pagkaon ngadto sa gagmay nga piraso aron malikayan ang ingon ini nga insidente.
