BUTUAN CITY – Padayong naglihok ang kagamhanan aron makapangita og malahutayong solusyon sa padayong pagsaka sa presyo sa lana na duna’y dakong epekto sa ekonomiya.
Gibutyag ni House Committee on Ways and Means chairman Rep. Miro Quimbo, gi-asdang sa gobyerno ang paggamit sa renewable energy sama sa solar ug battery storage apil na ang pagpakaylap pa sa electric vehicle aron malikayan ang pagsalig sa imported petroleum products.
Gisugyot usab nga himuong de-kuryente ang katunga sa mga sakyanan sa gobyerno ug aron masolusyunan ang krisis, magmugna ang kamara og usa ka joint committee nga tawgong Legislative Energy Action and Development Council.
Ubos sa kamanduan ni House Speaker Faustino ‘Bojie’ Dy, tumong niini nga hi-usahon ang pipila ka komite aron makuting matubag ang oil price shock sa nasud.
Gipasabot sa magbabalaud nga duna’y domino effect ang pagtaas sa presyo sa lana tungod kay ma-apektuhan usab niini ang presyo sa pagkaon, pamasahe ug uban pang mga palaliton nga mas nagpasamot pa pagpataas sa inflation rate nga gibana-banang mu-abot sa 5.1-porsiento.
Pinaka-apektado niini ang sektor sa transportasyon kondiin mitaas ang pamasahe apan nagpabiling limitado ang kita sa sa mga drivers ug operators.
Apil usab sa susihon ang mga oil companies tungod sa dungan nga pagpatuman nila og increase kada-semana nga makonsiderang cartel-like behavior ilabina nga pipila lang ang mga dagkong kompanya rason nga iyang gipanawagan ang mas lawom nga imbestigasyon.
