BUTUAN CITY – Gitimbaya ni US President Donald J. Trump ang upat ka astronaut sa Artemis II human sa ilang malampusong siyam ka adlaw nga misyon palibot sa bulan ug luwas nga splashdown sa kadagatan duol sa San Diego, California.
Matod sa pangulo, “spectacular” ang tibuok biyahe ug “perfect” ang pag-landing sa Orion spacecraft.
Iyang gipadayag usab ang garbo para sa crew nga sila Reid Wiseman, Victor Glover, Christina Koch, ug Jeremy Hansen, ug giimbitar sila sa pagbisita sa White House sa labing dali nga panahon.
Dugang pa niini, plano matud pa nila nga usbon pag-usab ang maong misyon ug ang sunod nga target mao ang planetang Mars, kauban ang padayon nga suporta sa gobyerno sa programa sa NASA Artemis.
Ang Artemis II nakapahimo og bag-ong rekord isip pinakalayong distansya nga naabot sa tawo gikan sa Yuta, nga miabot sa kapin 400,000 kilometro, ug nakahatag og mga hulagway gikan sa lunar orbit lakip ang talan-awon sa “Earthset.”
Ang malampusong pagbalik sa crew giisip nga importante nga lakang padulong sa Artemis III, nga gilauman magdala sa mga astronaut sa ibabaw sa bulan sa unang higayon sukad pa niadtong 1972.
