BUTUAN CITY – Gipahayag sa Department of Foreign Affairs (DFA) ang grabeng kasubo sa pagkamatay sa usa ka Filipina human naigo sa missile attack ang panimalay nga gipuy-an sa Haifa, Israel niadtong gabi-i sa Abril 5, 2026.
Namatay usab sa insidente ang iyang banang Israeli ug tigulang nang mga umagad.
Sumala sa DFA, gelayon nga gipahibalo sa Philippine Embassy sa Tel Aviv ang panghitabo sa pamilya sa biktima ug kasamtangang naghatag sa tanang kinahanglang tabang lakip na ang pagplastar alang sa pinakapaspas nga repatriation sa mga patay’ng lawas bisan paman sa lisud nga sitwasyon sa pagbiyahe sa rehiyon.
Nangayu usab ang pamilya og pribadong panahon aron magbangotan diha sa kahilom.
Gitumbok sa DFA ang pakighiusa sa Filipino community sa pag-ampo alang sa iyang kalag ug sa kusog sa iyang pamilya taliwa sa dakong kasubo.
Ang Haifa usa sa pinakadakong siyudad sa Israel nga makita sa amihanang parte sa nasud.
Sa mga nakalabay nga tuig, kini nahimong target sa mga missile attacks alayon sa padayon nga tensyon sa rehiyon.
Ang DFA dunay mandato nga seguruhon ang kaluwasan ug kahimtang sa mga Pilipino sa ubang nasud lakip na ang paghatag og tabang sa mga biktima sa kagubot o trahedya.
Ang maong insidente subling nagpahinumdum sa kadelikado sa mga Pilipino sa mga nasud nga dunay kagubot ug sa kamahinungdanon sa padayon nga suporta sa gobyerno sa ilang proteksyon.
