BUTUAN CITY – Nakatakdang magpagawas si Pangulong Ferdinand Marcos Jr. og usa ka executive order aron ipatuman ang price cap nga ₱50 kada kilo alang sa imported nga well-milled rice.
Sumala sa Pangulo, “Ipagawas ang Executive Order aron mapatuman kini sa labing dali nga panahon,” human sa meeting sa Unified Package for Livelihoods, Industry, Food and Transport Committee.
Dugang pa sa Pangulo nga gipalapdan usab ang ₱20/kilo nga programa sa bugas sa gobyerno.
Sa pagkakaron, adunay na 627 ka distribution centers sa tibuok Philippines.
Gikan sa kaniadto nga 600 tonelada nga suplay, misaka na kini sa 2,000 tonelada tungod sa pagtaas sa demand.
Ang maong lakang gibase sa rekomendasyon sa National Price Coordinating Council nga maoy nagdumala sa pagmonitor ug pagpatunhay sa presyo sa mga batakang palaliton.
Gipahayag usab sa Pangulo nga nagpabilin sa suggested retail price ang presyo sa mga batakang palaliton, lakip na ang bugas.
Padayon ang paningkamot sa gobyerno sa pagkontrol sa presyo sa 205 ka commodities taliwala sa kasamtangang krisis sa enerhiya.
Padayon usab ang pakig-alayon sa gobyerno sa mga manufacturer ug retailer nga dili sa una magtaas og presyo hangtod sa sunod bulan.
Samtang gipirmahan usab sa Pangulong Ferdinand Marcos Jr. ang Executive Order No. 110 nga nagdeklarar og state of national energy emergency tungod sa nagpadayon nga tensyon sa Middle East.
Ilalom niini, gihatagan siya og gahum sa pagpatuman og mga lakang alang sa fuel ug energy allocation, apil na ang mga programa sa pagtipid sa enerhiya.
Apil usab sa maong kamanduan ang pagpalig-on sa UPLIFT isip kinatibuk-ang framework sa gobyerno alang sa koordinadong pagtubag sa mga isyu sa panginabuhian, industriya, pagkaon, ug transportasyon.
