BUTUAN CITY – Negatibo sa ginadiling drugas ang mga bus, van, taxi, bajaj ug modern jeepney drivers apil na ang mga conductors sa gilusad nga surprise random drug test sa Philippine Drug Enforcement Agency kon PDEA-Caraga kaganinang buntag sa may Langihan Premium Bus Terminal ug Robinsons Bus Terminal ning siyudad sa Butuan.
Sigon ni regional spokesperson Dindo Abellanosa, ka-abag nila sa maong drug test nga gibansagan og ‘Oplan Harabas’ ang Land Transportation Office-Caraga, city government pinaagi sa ilang City Drug Abuse Council kon CADAC, kapulisan ug Highway Patrol Group kon HPG. Sa eksklusibong pakighinabi sa Bombo Radyo Butuan, gipadayag ni Abellanosa nga tumong sa maong drug test nga masiguro nga ang tanang mga drivers ug ilang conductors, magbiyahe sa nagkada-iyang dapit sa Mindanao nga wala mugamit og ginadiling druga apil na ang wala paggamit og ilimnong makahubog.
Giklaro sa opisyal nga ang mga drivers ug conductors nga nagpositibo sa mi-agi nilang Oplan Harabas, gipa-ilalom gilayon sa orientation alang sa pagpa-ilalom kanila sa community-based rehabilitation program kansa rekisitos aron ma-uli kanila ang gi-embargo nilang drivers’ license kansa pagtugot na usab aron makabalik sila pagpamasada.
Sa mi-agi matud pa nila nga Oplan Harabas, duna’y upat ka mga indibidwal ang gipa-ilalom sa community-based rehabilitation program sa lugar diin sila nagpuyo apan usa kanila ang wala mupadayon hinungdan nga hangtud karon, wala pa makuha ang iyang driver’s license.
Kung hisgutan matud pa ang pag-revoke sa lisensya sa maong driver, bugtong ang taga-Land Transportation Office ang makahimo niini. Kini tungod ang ilang papel, kutob man lang sa pag-assist sa drug test.
