BUTUAN CITY – Gitaho ni Pangulong Ferdinand Marcos Jr ang mga lakang nga gihimo sa gobyerno aron matubag ang epekto sa giyera sa Middle East dayong barog nga wala’y krisis sa lana tungod kay igo ang suplay niini karon sa nasud.
Giklaro pa niya nga wala’y angayang kabalak-an ug dili angayang mag-panic ang publiko tungod kay gihimo na sa mga hingtungdang ahensya sa gobyerno ang mga angayang lakang. Nakig-istorya na usab ang gobyerno ngadto sa mga kompanya sa lana.
Aminado usab ang pangulo nga duna’y katapusan ang kakapas sa kagamhanan nga pugngan ang paghuyang sa balor sa piso kontra dolyar.
Dili matud pa praktikal nga hutdon ang foreign reserves sa nasud aron lang panalipdan ang balor sa piso, ilabina nga na-apektuhan kini sa paglihok sa pangkalibutanong merkado.
Sa hisgutanan usab sa mga overseas Filipino workers, gipadayag sa pangulo nga nakig-alayon na sila sa mga nasud nga apektado sa giyera ug mipasalig nga wala matud pa’y angayang kabalak-an sa mga Pinoy nga atua sa ilang mga nasud.
Sa pagkakaron, naka-upat na ka chartered flights ang gobyerno nga nagdala sa mga OFWs pabalik dinhi sa Pilipinas.
